Хотодомнай худалдаа наймаанай  һалбариин ажалшад ерэхэеэ байһан мэргэжэлтэ һайндэрөө үргэнөөр тэмдэглэбэ. Тус хэмжээ ябуулгада уласай худалдаа наймаанай болон ниитын эдеэ хоолой 40- өөд үйлэдбэринүүдэй 270 гаран хүдэлмэрилэгшэд хабаадаа. Нэн түрүүн һалбариин ажалшад болон үйлэдбэриин ветерануудые мэргэжэлтэ һайндэрөөрнь Засагай газарай түлөөлэгшэд амаршалба.  

 Бүхыдөө эндэ уласай 17 аймагуудай түлөөлэгшэд хабаадаа. Тэдэндэ баяр ёһололой тоглолто болон  асуудал ба харюутай наадан эмхидхэгдээ. 60 гаран ажалшадта Буряад Уласай Толгойлогшын Баярай бэшэгүүд, Засагай газарай болон Буряад Уласай үйлэдбэриин, худалдаа наймаанай болон хүрэнгэжүүлгын яаманай хүндэлэлэй грамотанууд барюулагдаа.  

Улас дотор тус һалбари нилээд эршэтэйгээр хүгжэжэ байна, жэжэ худалдаанай газарнуудай тоо түргэн ургана, худалдаанай сүлжээнүүдэй эд бараанай, эдеэ хоолой  шанарай һайжаржа байһые хэрэглэгшэд анхарна, мүн һалбарида хабаатай ажалшадай тоо олошорно.