Булган аймагта үнгэрһэн 15-дахи Алтаргана наадан дэлхэйн дүшэн оронуудһаа буряадуудые суглуулба. Эндэ хабаадагшад хэдэн хоногой туршада элдэб талмайнуудта абьяас бэлигээ харуулаа, тиихэдэ арадай дуунай мүрысөөндэ эгээл олон зон хабаадаһан байна.

Дотор Монголой зүжэгшэд шүүгшэд болон  сугларагшадые гоё һайхан хоолойгоороо баясуулаа.
Эстрадын дуу дуулагшад харагшадаа баһал һонирхуулжа шадаа. Конкурсын дүнгүүдээр, эдиршүүлэй дунда Буряадаймнай Иисэнгэ нютагаархид, аха наһанай бүлэгтэ нютагаймнай дуушад илажа гараба.
Наада эмхидхэгшэд сурбалжалагшадай дунда амяараа конкурс үнгэргөө. «Нүүдэлшэн» гэһэн фильм буулгаһан манай телесубагай захирал Виталий Раднаев эндэ мүнгэн медаляар шагнагдаба.

Эрын гурбан наадан заншалта ёһоороо эгээл ехээр бултанай һонирхол татаа. Буряад барилдаагаар манай бүхэшүүл сооһоо Зорикто Ухинов хахад финалда хүрөөд, Орхон аймагай барилдаашанда булигдаа. 
Эрын гурбан нааданай абаргануудта хүнгэн унаануудай түлхюурнүүд барюулагдаа гэжэ тэмдэглэлтэй. 
Буряадай түлөэлэгшэд, Алтарганада хабаадагшадые дэмжэхэеэ ошоһон нютагаархиднайшье тоогоороо  харагшадай дунда бусадһаа олон байба. 

Хабаадагшадшье, харагшадшье нааданай һайн эмхидхэл тэмдэглээ. Буряадай Толгойлогшо Алексей Цыденов Булган аймагай губернаторай, тэрэнэй суг ажалтанай хэһэн ажал,  бэлэдхэлэй хүдэлмэри үндэрөөр сэгнэбэ. Хоёр жэл болоод, Улаан-Үдэдэ болохо Алтаргана наада баһал иимэ үндэр хэмжээндэ үнгэргэхэ хэрэгтэй гэжэ тэрэ тэмдэглэһэн байна.
Бүхы мүрысөөнүүдэй дүнгүүдээр, Буряадай түлөөлэгшэд 51 медальда хүртөө, тэдэнэй 13-ниинь – алтан.