Һүүлшын хоёр жэлдэ Буряадай үндэһэтэнэй музей, уласаймнай мэдээжэ хизаар ороноо шэнжэлэгшэ Лев Бардамовай галерей “Байгал” гэһэн аяншалгын мэдээсэлэй түбтэй хамта буряад хэлэ дэмжэһэн тусхай түсэл бэелүүлжэ байна. Экскурсинүүд буряад хэлэн дээрэ эмхидхэгдэжэ, олоной һонирхол татана.
Түрүүшын экскурсида түрэл хэлэндээ, соёл урлалдаа дуратайшуул, дэмжэгшэд, залуушуулшье зорижо хабаадаба.
Галерейн жасын баяниие булта сэгнэжэ, түүхэ тухайнь тодорхой, гүнзэгы хөөрөөнүүдые шагнажа урмашана. 20 гаран жэл соо суглуулжа байһан үзэсхэлэнтэ зэмсэгүүд олоной анхаралда табигдаатай.
Буряадай үндэһэтэнэй музейн мэргэжэлтэд буряад хэлэн дээрэ үшөө хоёр экскурси сентябрь һарада үнгэргэхэ. Удангүй улас доторнай буряад хэлэнэй габшагай һара эхиеэ абаха, тэндэ баһал олон тоото хэмжээ ябуулгануудые эмхидхэхэбди гээд тэдэ тодорхойлно.
