Эсэгээ ороноо, түрэл арадаа хархис дайсадһаа хамгаалха хэрэг хэтын хэтэдэ эрэ хүнэй уялга байһаншье, тиимэ зандаашье. Оршон үедэ тэрэ бүри гүнзэгы удха шанартай болонхой. 1942–1945 онуудай Эсэгын дайнда буряад хүбүүднай эрэлхэг зоригоо харуулжа, Агууехэ илалта шэрээлсээ бэлэй.
Тэдэнэй жэшээ дээрэ мүнөө үеын баатар сэрэгшэд үндыгөө ха юм. Тиимэһээ мүнөөдэрэй Россиин Геройнуудай эрэлхэг ябадалай үндэһэ һуури угаараа эсэгэнэрһээ дамжан ерээ. Тэрэниие харуулжа, мүн элдэб яһанай залуу сэрэгшэдэй нүхэсэл, ханилха тухай “Брат ты мне” гэһэн баримтата фильм зохёон байгулагдаа гэжэ хөөрөө һэмди. Энэ удаа фильм Буряад Улас дотор олондо дурадхагдаба.
Баримтата кино буулгаха гэһэн хэрэг үнэн алдарта шажанай санаартан Евгений Старцев үүсхэжэ бэелүүлбэ. Өөрөө сэрэгэй албанда ябаһан, тэрэ сагтаа элдэб яһанай хүбүүдтэй суг хамта дайлалдажа, ханилжа, түрэл мэтэ болоһомди гээд хөөрэнэ. Сэрэгшэдэй нүхэсэл тухай зураг дээрэ харуулжа, зондо хөөрэхэ гэжэ шидээ. Эрхүү можын «Иркутский Кремль» гэһэн эмхиин ажалшадтай “Брат ты мне” гэһэн фильмын түрүүшын хуби буулгаһан юм. Дахин кино зохёохо шиидхэбэри 2023 оной зун абтагдаа һэн гээд тодорхойлно.
Фильмын режиссёр Мария Филатова. Тэрэ олон жэлдэ баримтата кино буулгадаг, зохёодог мэргэжэлтэн. Энэ бүтээлнай хадаа түүхэтэ үйлэ хэрэг болоно гээд хэлэнэ.
Кинойго гол геройнууд СВО-до алба хэжэ ябаһан сэрэгшэд. Тэдэнэй тоодо Агын тойрогой Урда-Ага нютагһаа гарбалтай БИЛЬЧИР гэжэ позывнойтой хүбүүн. Тэрэ танкистнуудые ударидан ябана. Фильмтэй танилсалгада гэртэхиниинь зорижо ерэһэн байна.
Энэ фильм Улаан-Үдэ хотын һурагшад, оюутадта дурадхагдаа. Эхэ ороншо ябадал ургажа ябаа улаан бургааһаднай мүнөө харуулна. Сэрэгшэдтэ бэшэгүүдые бэшэжэ, баярай, омогорхолой, дэмжэһэн үгэнүүдые зорюулдаг. Эндэ һуужа кино харалсаһан хүбүүдэй нэгэн ерээдүйн баатар сэрэгшэ боложошье магадгүй.
