«Загаһатын кубок» гэһэн хүл бүмбэгөөр түрүүшын мүрысөөн эрэшүүлэй 9 команда, ветерануудай 3 команда суглуулба. Наһатайшуулай бүлэгтэ наадан дүхэригэй гуримаар үнгэржэ, командануудай хоорондохи мүрысөөнүүдэй дүнгүүдээр илагша бүлэг элирээ. Эндэ Загаһата нютагай 1-дэхи команда шанга наада харуулжа, түрүү һуурида гараа.
Эрэшүүлэй командануудай наадан нилээдгүй түгшүүритэйгээр үнгэрөө. 9 команданууд гурбан бүлэгтэ хубааржа, тэдэнэй хоёрынь лэ шалгаржа гараа. «Навбахор-2» гэһэн узбек команда өөрынгөө бүлэгтэ нэгэдэхи һуури эзэлжэ, түгэсхэлэй гурбанай нэгэдэхи шатада Могсохон нютагай тамиршадтай уулзаа.
«102 квартал», «Эрхирик», «Буряад ТВ», «Загустай- сити» команданууд баһал шанга наада харуулаа. Түгэсхэлэй нааданда гарахын түлөө нилээдгүй шанга тэмсэл боложо, манай телесубагай команда мүрысэгшэдэйнгөө саха руу пенальтиин дүнгөөр эрхим гурбан командын тоодо орожо шадаа. Тиигэжэ «Буряад ТВ», «Загустай-сити», «Навбахор-2» команданууд түгэсхэлэй нааданда гараба. Нилээд шанга нааданай удаа мүрысөөнэй гол шан нютагай «Загустай- сити" команда абаба.
«Буряад ТВ» субагай команда хоёрдохи, узбек хүл бүмбэгэшэд гурбадахи һуурида гараа.
Тус мүрысөөнэй ябасаар эмхидхэлшэд яһалхан сэдьхэлээ ханангинууд, харамтайнь гэхэдэ, хабаадаха дуратай бүхы команданууд булта ерэжэ шадаагүй гээд тодорхойлно. Гэбэшье Загаһата һууринда хүл бүмбэгэшэдэй ёһотойл һайндэр болоо.
Мүрысөөнэй эмхидхэлэй тала үндэр хэмжээндэ байгаа гэжэ тэмдэглэлтэй. Хүдөөдэ хүл бүмбэгын һайндэр үнгэргэхэ гээшэ бэлэн хэрэг бэшэ. Нютагай захиргаанһаа гадна, Загаһата нютагаархид болон олзын хэрэг эрхилэгшэд энэ хэмжээ ябуулга эмхидхэлгэдэ горитой туһа хүргөө. Эмхидхэгшэд тус мүрысөө жэл бүри үнгэргэхэ, тиихэдэ Буряад ороной бүхы аймагуудһаа командануудые уриха хүсэлтэй байһанаа мэдүүлээ. Хойто жэлдэ адагынь 15 команда хабаадуулагдахаар түсэблэгдэнэ.
