Улаан-Үдэ хотодо олон хүүгэдтэй айлнуудай тоо 8 хахад мянгандаа хүрэнхэй. Мүнөө дээрээ улас дотор иимэ бүлэнүүдтэ ехэхэн дэмжэлтэ үзүүлэгдэнэ. Һуралсалай шэнэ жэлэй эхиндэ Буряадай Уласай Засагай газар нэмэлтэ хэмжээнүүдые абаба.

Ямар аргаар энэ хэрэг бэелүүлэгдхэб? Нэн түрүүн,  үхибүүн бүхэн “МИР” түхэлэй банкын хабтаһатай байха ёһотой. 14 наһанһаа доошо хүүгэдтэ гэртэхиниинь өөһэдынгөө данса бэшэг дээрэ үндэһэлжэ, эдиршүүлэй карта гаргаха аргатай. Удаань Хүн зониие ниигэмэй талаар хамгаалгын яаманда тусхай мэдүүлгэеэ оруулха. Тэрэ хэрэг МФЦ-дэ гү, али һургуулиингаа мэргэжэлтэдэй хүсөөр бэелүүлхэ арга боломжо бии. Мүн дээдэ гү, али дунда мэргэжэлтэ һургуулинуудта очно аргаар һуралсал гаража байһан хүүгэдтэй айлнууд тэдэнэйнгээ 23 наһа гүйсэтэр, энэ дэмжэлтэдэ хүртэхэ аргатай. Тодорхойлбол, уласай нютаг һуурингуудта түлбэригүйгөөр гансал муниципальна унаануудаар июниин 15 болотор ябажа болохо.

Нэмэжэ хэлэхэдэ, энэ тэдхэмжэ 5-11-дэхи ангиин һурагшадта үзүүлэгдэхэ, мүн олон хүүгэдтэй бүлэ соо гүрэнэй дунда мэргэжэлтэ һургуулинуудай оюутадай  байбал, тэдэ очно аргаар һуража, 23 наһа гүйсэтэрөө, баһал халуун эдеэгээр хангагдаха. 

Энэ үнэмшэлгэ абахын тула МФЦ гү, али аймагайнгаа социальна таһагуудта хандаха арга бии. Хуушан үнэмшэлгэ хүсэеэ алдахагүй, энэ дороо шэнэлхэ эрилтэ үгы гээд тодорхойлогдоно.