Һэеы гэрэй дүрсэтэй палатканууд, үрэжэ, үнгэжэ угаадаг шабдаанууд – эдэ зүйлнүүдые олондо мэдээсэл тараадаг мэргэжэлтэдтэ харуулжа, хөөрэжэ байгаад, Буряад театрай тайзан дээрэ уран һайханай хүтэлбэрилэгшэ Олег Юмов угтаба. Мүнөө байһан зүжэг юрын бэшэ, тэрэ монгол хэлэн дээрэ табигдана. Совет-Монгол сэрэгэй Халхын гол дээрэ Японой Квантунска сэрэгые бута сохижо, илалта туйлаһаарнь, август һарада тэбхэр 85 жэл үнгэрхэ. Аюулта Халхын   дайнай тэрэ үеын байлдаанда хабаадаһан сэрэгшэдэй, субилагшадай хөөрөөн болон түүхын дансанууд дээрэ үндэһэлжэ бэшэһэн Геннадий Башкуевай пьесэ зүжэг боложо табигдаба. Гадна Халхын голой дайнай ветеран, тэрэ сагта арбан зургаан басагад өөрын дураар дайнай газарта ошожо шархатаһан сэрэгшэдые эмнэхээ ябаһан. Тэдэнэй тоодо мүнөө амиды мэндэ ажаһуугша – Дорнод аймагай буряад басаган Цэрэнгийн Чимэдцэрэн. Эгээл Цэрэнгийн Чимэдцэрэн зүжэгэй гол нюур болоно. Энэ харюусалгатай дүрые Арюна Цыденова зүжэгшэн наадана.«Халхын гол. Тангариг» гэһэн зүжэг Япон байлдаанай 85 жэлэй ойдо зорюулагдана. Тус зүжэг Буряад Уласай Толгойлогшо Алексей Цыденовэй үүсхэлээр бэелүүлэгдэнэ. Зүжэгэй түрүүшын наадалга июлиин 2-3-ай үдэрнүүдтэ харуулагдаха.