Нааданай түрүүшын үдэрэй гол һонин гэхэдэ, дэлхэйн илалта туйлагдаа. Тиигэжэ манай харагшадта мэдээжэ болоһон Жалсаб Манзаров өөрынгөө илалтые һайжаруулжа, дэлхэйн абарга боложо тодороо. “Би мэдээжэ болоо тоонойб” гэһэн нэгэдэхи каналай сэхэ дамжуулгада тэрэ 59 һээр хухалһан байгаа. Энэ удаа Жалсабай урда табигдаһан 80 һээрнүүдэй 63-ые хухалжа, абаргынгаа солые үшөө дахин гэршэлэн өөртөө үлээгөө.

Энэ нааданда эрэшүүлтэй суг эхэнэрнүүд, үхибүүд эбтэйгээр хабаадаа. Эгээ эдир хабаадагша Захааминай аймагай 8 наһатай Алдар Дылыков байгаа.

Эдир һээршэдэй дундаһаа Ахын аймагай 12 наһатай Сергей Дамшаев 24 һээр хухалжа, түрүүлжэ гараа. Эхэнэрнүүдэй дундаһаа Захааминай аймагай Юмжана Раднаева абарга болоо.

Эсэсэй нааданда 15 эрэшүүл үлэжэ хабаадаа. Эрхим гурбанай тоодо Агын тойрогһоо хоёр, Монголой нэгэ хүн оробод. Тиигэжэ эдэ гурбанай дундаһаа Могойтын аймагай Ушарбай тосхоной Чингис Батомункуев 2023 оной нааданай абарга боложо тодороо. Нааданай хугасаада тэрэ 33 һээр хухалаа.

Һээршэдэй энэ жэлэй мүрысөөндэ 570 хүн, илангаяа Захааминай аймагһаа олоороо ерэжэ эдэбхитэйгээр хабаадаһан байна. Энэ аймагһаа 20 команда ерээ, тэдэнэр бүхы нааданда хабаадагшадай гурбанай нэгэ хубиһаа үлүү  хүн ерэһэн байгаа.