Баргажанай аймагай Улан һууринда үнгэрэгшэ амаралтын үдэрнүүдтэ Ленинэй орденой кавалер, Дайшалхы Улаан Тугай гурбан ордендо хүртэгшэ, партизануудай бригадын командир Гуржаб Ванюшкеевич Очировой дурасхаалда зорюулагдаһан сүлөөтэ барилдаагаар заншалта мүрысөөн хүбүүд болон басагадай дунда үнгэрбэ.
Тус мүрысөөндэ Улаан-Үдэ хотоһоо, Баргажанай, Хурамхаанай, Хориин, Ивалгын аймагуудһаа 250-аад тамиршад хабаадаба.
Мүрысөөндэ илагшад болон шалгарагшад дурасхаалта бэлэгүүдээр шагнагдаа. Бултанда мэдээжэ болоһон энэ мүрысөөн Улан һууринда 1966 онһоо хойшо үнгэргэгдэнэ, тэрэ тон баян түүхэтэй юм. Тус мүрысөөндэ Европын болон дэлхэйн чемпионууд болоһон Буряадай нилээд олон мэдээжэ барилдаашад хабаадаһан, илалта туйлаһан байдаг.