Иигээд лэ элдэб жэлнүүдэй түгэсхэгшэд түрэл hургуулиингаа 100 жэлэй ойн баярта эдэбхитэйгээр сугларжа, эгээл дулаахан, балшар наhанайнгаа хаhа дурсаха гэжэ суглараа.

Хүсөөтын дунда hургуули 1926 ондо айлай модон гэртэ  байгуулагдаhан түүхэтэй. Тэрэ үедэ Сагаан Шулуутын гэжэ нэрлэгдэдэг байhан. Тиигэжэ 1936 ондо hургуулиин түрүүшын байшан баригдаһан бэлэй.

Эрдэмэй гуламтын ойн баярта бэлэдхэл нёдондо намарhаа эхилээ һэн. Тиимэhээ 1940-өөд онуудhаа энэ үе хүрэтэр, һургуули түгэсхэгшэд мүнөө дээдэ hургуулитай, гэр бүлэтэй, зариманиинь наhанай дабаае нилээд гаталжа, аша зээнэрээ хараха азатай, хүндэтэй үбгэд хүгшэд боложо, мүнөө түрэл hургуулидаа бусажа, халуун баяраа мэдүүлнэд.

Хүсөөтын дунда hургуули 100 жэлэйнгээ ойн баярта үсэгэлдэрэй шабинары, мүнөөдэрэй айлшадые тон дулаанаар угтаба. Гэбэшье тус hургуули уласай, гүрэнэй элдэб hалбаринуудта бэрхэ мэргэжэлтэд боложо ургаһан түгэсхэгшэдэй гуламта ха юм.