«Кубок Единства» тэмсээнэй хабаадагшад эртэ үглөөнһөө Ага буужа эхилээ. Эрхүү можын суглуулагдамал команда, һоригшодтоёо агаарай онгосоор Шэтэ буугаад, Ага болотор хүнгэн автоунаагаар хүрэбэ. Буряад уласай тамиршад Улаан-Үдэһөө сэхэ томо автобусоор буужа ерээ.

Барилдаашад саарһа дансануудаа тушаажа, бэеын шэгнүүртээ тудана гээшэ гүб гэжэ элирүүлбэ. Тэмсээнэй шүүгшэдэй бүлэг зүблөөгөө хэжэ, ёһо гуримуудаа лаблаба. Түрүүшын “Кубок единства” түрнирэй ахамад шүүгшэ -  Красноярск хотын һоригшо Александр Данзаленко. Эмхидхэлэй хорооной түрүүлэгшэ - Агын тойрогой захиргаанай толгойлогшо Ананда Дондоков. Сүлөөтэ барилдаанай һайндэр үндэр хэмжээндэ үнгэрхэ гэжэ эмхидхэгшэд найдана.

 Һануулая, үглөөдэр апрелиин 11-дэ үглөөнэй 9 сагһаа мүрысөөн эхи абаха. Бултадаа “Бүргэд” тамирай ордон бэеэрээ ерэжэ, барилдаашадые дэмжэгты! Буряад ТВ субагта сэхэ дамжуулга харагты!