Буряадай багша Монгол ороной эрхим уран бэшээшэдэй тоодо оробо.  Улаан-Баатар хотодо «Монголын сайхан бичигтэн-2025» гэһэн уран бэшэлгын мүрысөөнэй илагшадые шагналгын баяр ёһолол үнгэрөө. Тус мүрысөөндэ Арюна Булгутова ёһотоор Орос гүрэнөө түлөөлжэ ерээ.

«Титэм-Арт» студиин монгол ба уран бэшэлгын багша «Монгол туургатан, гадаадын иргэд» гэһэн шангай янзада хоёрдохи һуури эзэлээ. Нэрэ хүндэтэй зохёохы мүрысөөндэ Монголой болон бусад гүрэнүүдэй мянга гаран хүн хабаадаһан байна.

Монголой Юрэнхылэгшэ Ухнаагийн Хурэлсух илагшадта шагналнуудые өөрөө барюулаа. Тус мүрысөөн 29-дэхиеэ «Монцамэ»гэһэн Үндэһэтэнэй мэдээсэлэй албан үнгэргөө. Үнгэрэгшэ жэлдэ Арюна Булгутова мүн лэ тэрээндэ хабаадажа, 3-дахи һуури эзэлээ һэн.