Буряад Уласаймнай яаманууд Оросой хэблэлэй һайндэртэ зорюулан, олондо мэдээсэл тараадаг ажалшадта шагнал барюулгын ёһололнуудаа үргэлжэлүүлһээр. Энэ удаа Буряад Уласай Элүүрые хамгаалгын сайд Евгения Лудупова сурбалжалагшадые халуунаар угтан абажа амаршалба.
Хэмжээ ябуулгын баяр ёһололой хубида сэдхүүлшэдтэ Баярай бэшэгүүд ба гарай бэлэгүүдые Евгения Лудупова, уласай эмнэлгын эмхинүүдэй ахамад эмшэд барюулба. Шагналда хүртэгшэдэй тоодо манай телесубагай юрэнхы эрхилэгшэ Гунсыма Тудупова, «Нүхэд дундаа» дамжуулга хүтэлэгшэ Эрдэни Дагбаев гэгшэд оролсоо.
Буряад Уласта боложо байһан һонинуудые уншасатай, харасатай болгохын тула эрдэм мэдэсэеэ, бэлиг шадабарияа гаргажа, үлүүсэ оролдожо ябадаг сэдхүүлшэдэй дунда мүн лэ «Бурятия» ГТРК гэһэн телесубагай сурбалжалагша тэмдэглэгдэбэ.
Иигэжэл уласаймнай бүхы яаманууд сэдхүүлшэдэй ажалы үндэрөөр сэгнэһээр, һаяын үдэртэ мүн лэ Буряад Уласай Засагай газар, Буряад Уласай Толгойлогшо Алексей Цыденов тэдэниие амаршалха. Энээн тухай «Мүнөөдэр» дамжуулгадаа хөөрэхэбди, хүлеэн байгаарайт.
