Хүн бүхэнэй зүрхэ сэдьхэлдэ үхибүүн наһаяа үнгэргэһэн газар мартагдашагүй мүр сараа үлөөдэг гээшэ. Уран зурааша Юрий Раднаевта иимэ газар хадаа эжынь түрэһэн нютаг – Хориин аймагай Тохорюугта тосхон – болоно. Энэл нютагһаа тэрэнэй абьяас бэлиг эхитэй гэхэдэ, алдуу бэшэ.

Мүнөөдэр Цыренжаб Сампиловай нэрэмжэтэ уран зурагай музейдэ Юрий Дармаевичай «Эжын нютаг» гэһэн үзэсхэлэн нээгдэжэ, энэ ушараар олон нютагаархидынь –  тохорюугтынхид – сугларба.

Хүдөө нютагай гоё һайхан байгаали – заха хизааргүй Хориин дайда – тэрэл хэбээрээ зураатай һэн тула ногооной хоншуухан үнэрөөр анхилһан шэнги, талын наранай дулаахан элшэнь бэе дулаасуулһан мэтэ.