Зунай үеын, намарайшье хаhын танил тала дайдада танигдаагүй үльгэр домогуудай зүйлнүүд зурылдана. Иимэ hонирхолтой гүнзэгы удха нэбтэрүүлhэн зурагууд залууханшье hаа, бэлигтэй уран зураашын биирэhээ гарана.
«Хари газарай түүхэнүүд» гэһэн үзэсхэлэнэй нээлтын баяр ёhолол "Залуу" түбтэ үнгэрөө. Залуу уран зурааша Артем Ульянов Сэлэнгын аймагай Гусиноозерск хотодо Хүүгэдэй урлалай hургуулиhаа зураашанай түрүүшын алхамуудаа эхилhэн байна. Удаань Зүүн-Сибириин урлалай дээдэ hургуули дүүргэжэ, 2017 онhоо Буряадай оперо болон баледэй театрта уран зурааша-шэмэглэгшэһээ эхилээд, тайзан шэмэглэхэ цехые даагша хүрэтэр ургаһан байна.
Артем Ульянов өөрын уран һайханай юртэмсэ байгуулжа, ондоо түбиин амитад, метафизикын орон зайда байдаг, харин тэдэнэй «үдэр бүриин ажабайдалай» дэбисхэрынь Буряад ороной захагүй үргэн тала дайда болон бусад танигдаһан газарай нюруунууд болодог.
Уран зурааша харагшадаа сошоохогүй, харин түрэл нютагайнгаа байгаали тухай шэнэ, гайхалтай хараса дурадхаха, эди шэди, онсо шэнжыень онсолхо зорилго урдаа табина. Тиимэhээ гол ажалайнгаа хажуугаар сүлөө сагтаа дураараа урлажа байдаг залуу уран зураашын замай арюун байхань лабтай!
