«Мал хараха – ама тоһодохо» гэһэн урданай үгэ дэмы хэлэгдээгүй. Буряад үүлтэрэй мал үдхэхэ, мал ажахы эрхилэгшэдэй ажал хүнгэлжэ үгэхэ зорилготой шармайhан эрдэмтэн Булат Лхасаранов амиды мэндэ ябабал, мүнөө 75 наһанайнгаа ойн баярые угтаха байгаа.

Бүүбэй хадаа Буряад орондо нютагай абориген үүлтэрһээ гараһан, талын бэлшээридэ таараһан, эрилтэ багатай, тусхай үнэргүй һайн мяхатай, үдхэн, һайн шанартай нооһотой гэжэ сэгнэгдэдэг мяхан-нооһон үүлтэрэй хонид юм. Тиигэжэ Булат Бастуевич арадаа өөрын буряад хонитой болгожо, хүдөө ажахыда онсо нүлөө оруулhан байна. 

Оролдосотой эрхим эрдэмтэнэй мүнхэ дурасхаалда, ябуулhан эршэтэй ажалдань зорюулагдажа, Буряадай гүрэнэй хүдөө ажахын академидэ хуралдаан үнгэрөө. Тус хуралдаанда Булат Лхасарановай эхи табижа, буряад үүлтэрэй мал саашадаа үдхэхэ ажалые саашань хүгжөөхэ алхамууд хараалагдаа. 

Буряад үүлтэрэй эбэртэ бодо мал, бүүбэй хонидые байгуулха, адууhа моридой янза шэнжэлхэ, баһа тэмээ үдхэхэ ажал, табан хушуун малаараа наhаараа тэжээл хэжэ ябаhан буряад арадтамнай туhатай байха аа гү гэжэ биологиин эрдэмэй дид-доктор, селекционер Булат Лхасаранов ехэтэ оролдожо, үнэн зүрхэнһөө шармайдаг байһан.