Үбэлэй хаһада хаанаһаа нөөсэ эдеэ хоол абахада болохоб? Энэ асуудалда харюу Мухар-Шэбэр нютагта ажаһуудаг зон мэдэнэ. Тэндэ амаралтын үдэрнүүдтэ хүдөө ажахын яармаг үнгэрөө. Гуржаповтанай гэр бүлэ иишэ Тарбагатайн аймагһаа мяха худалдахаяа ерэһэн байна.
Тус яармагта уласай түбһөөшье наймаашад ерэжэ, Мухар-Шэбэр нютагай ажаһуугшадта элдэб эдеэнэй зүйл дурадхаба.
Хүдөө ажахын яармагта зон олоор суглараа. Жаргал Иванов иишэ Хушуун-Үзүүр нютагһаа ерэжэ, һайн шанартай мяха худалдажа абаһан байна.
Нютагайнгаа үйлэдбэрилэгшэдые дэмжэхэ, холисогүй сэбэр эдеэ хоолой зүйлнүүдые хэрэглэхэ гээшэ тон шухала гэжэ Мухар-Шэбэрэй аймагай хүдөө ажахын таһагай дарга Батомунко Цыбиков тэмдэглээ.
Түгнын талада бэлшэһэн малай мяхан эгээл амтатай гэжэ Мухар-Шэбэр нютагай Захиргаанай Толгойлогшо Ольга Янькова тодорхойлбо.
Мухар-Шэбэрэй аймагай захиргаанай Толгойлогшо Владимир Молчанов тус яармаг дээрэ гахайн мяха абаха түсэбтэйб гэжэ манай субагай зохёохы бүлгэмдэ хөөрэбэ.
Мяханһаа гадна, яармагта ерэгшэд эдеэ хоолой бусад ондоошье зүйлнүүдые худалдан абаа. Мухар-Шэбэртэ үнгэрһэн тус яармаг ажаһуугшадта ёһотойл һайндэр болобо.
