Шатар наадаар тэмсэгшые диилэхын тула хурса бодол, hонор ухаан, ехэтэ анхарал, гадна hайн бэлэдхэл хэрэгтэй ха юм. Уласай дунда мэргэжэлэй hургуулинуудай шатарша оюутадай тэмсээндэ Худалдаа наймаанай ба хуулиин экономикын техникумэй оюутан Тамир Доржиев hургуули дотороо бултыень булижа гараад, мүнөө уласай хэмжээнэй тэмсээндэ хаба шадалаа туршахаяа ерээ.
Заншалта болоhон интернационалист сэрэгшэдэй дурасхаалда зорюулагдаhан шатарай тэмсээндэ жэлһээ жэлдэ уласай техникумүүдэй оюутад хабаададаг. Бүхыдөө эндэ 20-ёод команда хабаадахаяа ерэhэн байна.
Удаань ерэхэ жэлэй февраль hарада хүл бүмбэгөөр мүрысөөн үнгэрхэ. Энээнhээ гадна, дайнай сэрэгшэдэй мүнхэ дурасхаалда зорюулагдаhан соёл урлалай дуу хүгжэмэй мүрысөөн эмхидхэгдэхээр хараалагдана.
