«Алтан баг» мүрысөөн дахинаа эхи татаба. Байгша ондо уласай аймагуудһаа болон Улаан-Үдэ хотоһоо 25 бүлгэмүүд хабаадана. Энэ удаа мүрысөөн Агуу Илалтын 80 жэлэй ойдо зорюулагдаа.

Һургуулиин театрнууд дүлэтэ дайн байлдааниие гаталжа гараһан хүнүүдэй дурсалганууд, уран зохёолшодой бэшэһэн зохёолнууд, тэрээнһээ гадна, буряад, нанай арадай онтохонууд дээрэ үндэһэлэн бэлдээ.

Хабаадагшад дайнай сэдэбүүдтэ хандахадаа, үбгэн абанар, элинсэгүүдэйнь хуби заяае хорото дайн яажа хубилгааб, ямар бэрхэшээлнүүдые дабажа гараха баатай байһан бэ гэжэ бодотоор харуулхые оролдоно. Заншалта ёһоор, мүрысөөндэ шалгаржа гараһан бүлгэмүүд Москва хото ошожо, ниислэлэй эрхим театрнуудые хараха азатай байха.