Буряад Уласай ниислэл хото руу Монголой тамирай һалбариин түлөөлэгшэд ерэбэ. Тэдэнэй зорилгонууд хадаа Улаан-Үдэ хотын мүнөө үеын тамирай байгууламжатай танилсаха, тамирай талаар мэргэжэлтэдые бэлдэхэ, арад зоной дунда тамир дэлгэрүүлхэ талаар дүй дүршэлөөрөө андалдалга болоо.

Нэн түрүүн, Монголой түлөөлэгшэд Буряад Уласай тамирай һорилгын түб руу ошоо. Тэндэ айлшад Һорилгын түбэй захирал Юлия Коцюбатай хөөрэлдэбэ.

Монголой түлөөлэгшэд һорилгын түбтэ «Стань чемпионом» гэһэн оньһоной-программын холбоо түхеэрэлгэтэй танилсаа. Эндэ хадаа саашадаа үхибүүн тамирай ямар һалбарида тааража бэеэ һорихо болоноб гэжэ элирүүлдэг газар болоно. Удаань Буряад Уласай тамирай һалбариин гэшүүд Монголһоо ерэһэн айлшадтай хөөрэлдөө эмхидхэһэн байна.

Монгол орон Буряад Улас хоёр тамирай талаар дүтэ, бэе бэедээ аша туһатай, үрэ дүнтэй хамтын ажал ходо ябуулжа байха тухай хэлсэбэ.