Октябриин 31-дэ хотын Театральна талмай дээрэ Арадай эб нэгэдэлэй үдэртэ зорюулагдаһан һүр жабхаланта хэмжээ ябуулга болобо. Нэгэдэл, эб найрамдалай һүлдэ тэмдэг болохо буряад арадай заншалта ёохор хатархаяа элдэб яһанай түлөөлэгшэд суглараа.
Энэ үдэр Улаан-Үдын ажаhуугшад хэлэн, соёл, үндэһэ яһанай талаар илгаатай байбашье, тус найрта эб нэгэн ажаһуужа байһанаа ёһотоор гэршэлээ.
"Сагаан ʏдэр" гэһэн арадай дуу, хатарай ансамбль мастер-класс хүтэлбэрилжэ, хабаадагшадтай энэ хатарай үндэһэн һургаалнуудаар хубаалдаа. Хүн бүхэн гансашье үнгэтэ тоглолто харахаяа ерээ бэшэ, харин хамтын дүхэригтэ хатаралсаха аргатай байгаа.
Энэ хэмжээ ябуулга олон яһанай ниигэмдэ эб нэгэдэл бэхижүүлхын, соёлой заншалнуудые сахижа байхын, үндэһэ яһанай хоорондын хани барисаа үндэрөөр сэгнэхын жэшээ боложо үгөө.
