Хэшээлнүүдэй хоорондо эдеэлхэ, амараад абаха  аятайхан газартай болошохо тухай хүсэл хадаа юрэ бусын ушар.Теэд тэрэ хүсэлөө бэелүүлхын тула ехэ бэлиг шадабари, тэсэбэри хэрэгтэй. Буряадай улас түрын Унаа тээбэриин техникумэй оюутад өөһэдөө үүсхэл гаргажа, Буряад Уласай болбосоролой бодолгын дээдэ һургуулиин эмхидхэһэн мүрысөөндэ хабаадаба.

 Һүүлээрнь оюутад түсэбөө бэелүүлжэ эхилээ. Эндэ тэндэһээ юумэ суглуулжа, зарим юумые худалдан абажа, юрын һуралсалай танхим эбтэйгээр заһабарилжа ороо. Энээндэнь оюутадай багша Светлана Булдакова туһалһан байна.

Хоёр долоон хоногһоо үлүү саг соо оюутад бүхы юумэеэ хэжэ, мүнөө одоошье эдеэлхэ, амарха аятайхан газартай болобод. Тэрэнээ тэдэ «Точка сборки» гэжэ нэрлээ, энэнь тон таарамжатай, Унаа тээбэриин техникум юм.

Эдеэ хоолой газарай нээлгын баяр ёһололдо хүндэтэ айлшад хабаадаа, тэдэнэй ерэһэниинь энэ түсэлэй аргагүй ехэ удха шанартай байһые харуулна гээшэ. 

Буряадай улас түрын Унаа тээбэриин техникум уласай 16 дээдэ ба дунда болбосоролой эмхинүүдэй хоорондо илажа гараа. Иимэ мүрысөөн уластамнай түрүүшынхиеэ үнгэрһэн байна.

 Буряадай улас түрын Унаа тээбэриин техникумэй оюутад иимэ зохид газартай болоһонһоо гадна, ехэ дүй дүршэлтэй болобо: эдэбхи үүсхэл гаргажа, мүрысөөндэ илажа, бодото бизнес-түсэл ударидаха хүрэтэр. Суг хамта ажаллабал, хүсэһэн бүхы юумэн бэелүүлэгдэхэ гэжэ тэдэ үшөө дахин гэршэлээ.