Дээдэ Онгостойдо Арьяа-Баалын ордоной барилга үргэлжэлһөөр. 6 дабхар байшангай үндэртэй ордон холоһоо харагдадаг. Дабхар бүхэниинь 2300 дүрбэлжэн метр тухай. Мүнөө дээрээ тэрэнэй ханануудынь бэлэн, оройнь баригдажа дүүрээдүй. Тус барилга оройдол ганса һүзэгшэдэй болон буян үйлэдэгшэдэй ашаар ябуулагдана.

Эндэ үдэр бүриин уншалгануудһаа гадна, һургаалнууд үнгэргэгдэдэг болохо юм. Мүн тиихэдэ Зүүн зүгэй эмнэлгын түб нээгдэхэ. Дуган нэгэ доро мянга гаран һүзэгшэдые багтааха аргатай байха. Ордоной түбтэ 17 метр үндэртэй Арьяа-Баала бурханай дүрэ бодхоогдохоор хараалагдана. Тэрэниие Буряадай мэдээжэ уран барималша Даша Намдаковай уридшалан хэһэн зурагаар бүтээгдэхэ. 

Бурханай дүрэ бүтээхэ модон бэлэн. Хуша модон 10 жэлэй туршада хатаагдажа хадагалагданхай, харин оройнь бэлэн болоодүй дээрэһээ ажал үшөө эхилээдүй. Бороодо оробол, бурханай модон дүрэ хэб түхэлөө алдажа, гажажа болохо. Тус дуганай барилга 11 жэлэй туршада ябуулагдана гэжэ һануулая, харин хэгдэхэ ажал үшөөл ехэ. Мүнөө дээрээ дуганай орой дүүргэхын тула Назаровска дулаалха эд хэрэгтэй гэжэ Диваажан дуганай соржо лама хубаалдаба.

 Хотымнай эгээ томо дуган барилгада бүхы дуратайшуул туһалха аргатай. Дээдэ Онгостойн Диваажан дуганай кассада үргэлөө дамжуулхада болохо.