Буряад Уласта Буддын шажанай асуудалнуудаар залуушуулай нэгэдэхи хуралдаан эхи абаа. Эндэ Монгол, Венгри, Энэдхэг, Хитад, Тайланд гүрэнүүдэй түлөөдэгшэд хабаана. Тус хуралдаа уласаймнай түрүү дээдэ һургуулинууд эмхидхэнэ гэжэ Д-Д. Заяевай нэрэмжэтэ буддын шажанай ехэ һургуулиин захирал Дымбрыл Дашибалданов хэлэбэ.
Буряадай гүрэнэй ехэ һургуулида хоёр сэдэбээр дүхэриг шэрээнүүд үнгэргэгдөө. Тэдэнэй нэгэниинь Эсэгэ ороноо хамгаалгын Агууехэ дайнай үедэ Буддын шажанай санаартанай дүүргэһэн үүргэ тухай асуудалда зорюулагдана.
Мүн лэ тус дүхэриг шэрээдэ сэрэгэй тусхай ябуулгада шархатаһан сэрэгшэдэй сэдьхэлэй байдалда буддын шажанай ашаар яажа туһалхаб гэһэн хөөрэлдөөн үнгэрөө.
Хоёрдохи үдэр Ази түбиин арадуудай бэшэмэл баялиг тухай хэлсэгдээ. Мүн тиихэдэ хуралдаан Байгал далайн үзэсхэлэнтэ эрье дээрэ түгэсэхэ юм. Эндэ зунай һургуули үнгэргэгдэхэ байна. Хабаадагшад «Буддын шажанай Сангха тухай мүнөө үеын хараа бодолнууд» тухай һанамжануудаараа хубаалдаха, мүн баһа ондоошье асуудалнуудаар хөөрэлдэхэ юм.
