Энэ нютаг тухай фильм нара харахань. Түрүүшын үндэһэн телесубагай зохёохы бүлэг үргэн, дууһашагүй тала газарнуудтай, түргэн урасхалтай гол мүрэнүүдтэй, дабтагдашагүй һайхан Зугмаара нютаг руу айлшалба. Энэ хадаа хүн бүхэниие хододоо татажа, хүлеэжэ байдаг булан.

 Зугмаара хадаа Петровск-Забайкальска аймагай Хёлго мүрэнэй зүүн эрье дээрэ байгуулагдаһан багахан тосхон. Тэрэ ерээд үрхэтэ айлтай 250 хүнэй ажаһуудаг һуурин. Зугмаарада ехэ эмхинүүд үгы, колхоз үни хада һандарһан, иимэ нютагуудые мүнөө олонхи ушарта “холын хараагүй” гэжэ хэлсэдэг болонхой, харин нютагаархидта харуулха, хөөрэхэ юумэниинь яһалхан бии.

Нютагай ёһотой шэмэг, омогорхолынь – энэрхы сэдьхэлтэй ажалша бэрхэ зон. Зугмаара гээшэ нэгэ ехэ гэр бүлэ, эндэ хүн бүхэниинь нэгэ нэгэеэ хододоо дэмжэжэ, хахад үгэһөө ойлголсожо, туһалжа, бэе бэеынгээ амжалтада баярлажа байдаг юм.

 Он жэлнүүд үнгэрнэ, саг хубилна, тиигэбэшье эндэ тэндэ элинсэг хулинсагуудайнгаа абажа ябаһан һайн һайхан заншалнуудые – соёлой ба ёһо журамай үнэтэ зүйлнүүд, найдамтай байдал, түрэһэн нютагтаа дурлал – бүхы хүсэ шадалаа гаргажа, сахиха гэжэ зугмаарынхид оролдодог. Энэ нютаг тухай фильм зунай һүүлшын һарада манай субагай сэнхир дэлгэсэ дээрэ гараха, анхаржа байгаарайт.