«Амар сайн» үндэһэтэнэй дуу, хатарай театр 34-дэхи хаһаяа хааба. Энэ жэлэй эгээл урагшатай, һонирхолтой, мүн шухала түсэл гэхэдэ «Номоконов, тайгын бөө» гэһэн шэнэ зүжэг юм. Энэ хадаа Эсэгэ ороноо хамгаалгын Агууехэ дайнай үеын домогто снайпер Семен Номоконовта зорюулагдаа. Семен Данилович - эрэлхэг, бата бэхи байдалай һүлдэ тэмдэг, буряадай баатарнуудай нэгэн болоно.

 "Амар сайн" театрай тоглолто бүхэн танхимаар дүүрэн харагшадтай үнгэрдэг. Энэ удаа баһал олон зон байба. Агын Буряадай тойрогой хүдөө нютаг һуурингуудһаа хүн зорижо ерэдэг. Театрай артистнарай дүй дүршэл, бэлиг ехэ үндэрөөр тэдэ сэгнэбэ. Хүн бүхэнэй зүрхэ сэдьхэл гүнзэгыгөөр хүдэлгэжэ шадаа гээд, харагша Наталья Дамшаева хөөрэнэ.

Заншалта ёһоор театральна жэлэй эсэстэ эгээл эрхим артистнарые элирүүлдэг. Тэрэ үндэр нэрэ зэргэдэ мүнөө жэл хатаршад Вера Балданова ба Алексей Дымбрылов хүртөө, дуушадай дунда - Ирина Насанова, хүгжэмшэд сооһоо - Соелма Жалсандоржиева. Харин "Эгээл эрхим ажалшан" гэһэн шан Долгор Цырытронада барюулагдаа. Гэхэ зуура бусадшье театрай ажалшад шагналнуудта хүртөө. Соёлшод зунай сагта харагшадаа баярлуулха шэнэ түсэлнүүдые һанаха, шэнэхэн дуу, хатарнуудые зохёохобди гээд найдуулаа.