Агын дасанда Буянта һарада Арьяа Баалада зорюулагдаһан мааниин хурал жэл бүри хурагдадаг. Энэ хадаа ламанарай хүтэлбэри доро юрын зондо үнгэргэгдэдэг буддын шажанай бисалгалай ёһо юм.

Гуша гаран һүзэгшэд, тэрэ тоодо залуушуулшье Үбэр-Байгалай нютаг һууринуудһаа хабаадахаяа зорижо ерээ. Теэд онсонь гэхэдэ, гурбан үдэрэй туршада һүзэгшэд тусхай газарһаа гарадаггүй, хатуу масаг бариха хэрэгтэй, абяагүй байха тангариг үгэхэ, мүргэхэ, Арья Баалада зальбарха, «Ом Ма Ни Бад Мэ Хум» гэһэн тарни оло дахин уншаха ёһотой. Энэ тарни хүниие мэхэ гохоһоо, мунхагһаа, хооһонһоо сүлөөлнэ, Бурхан багшын 84 мянган һургаал булта оронхой юм гээд лама санаартан хэлэнэ.

Һүзэг этигэлэй хүсөөр, зальбарал, буян хэхэдээ мүнөө амидаржа байһан зон наһаяа бараһан дүтынгөө зондо, түрэлнүүдтээ, нүхэдтөө, нютагаархидтаа ерээдүй ажабайдалда һайн түрэл олохо хэрэгтэнь туһалха аргатай. Сэдьхэлдээ сагаан һанал бодол түрүүлбэл, бэеын элүүр энхэшье һайжардаг гээшэ.