Агын Буряадай тойрогто эдир һээршэд сугларжа тон бүхэ нюдаргатайшуулаа элируулбэ. Ехэшүүлэй хабаадалгатай Һээр шаалганай мүрысөөнүүдые харахада гоё, сэдьхэл хүдэлгэмэ байдаг, үхибүүдэй тэмсээн бүришье. Энэ удаа Агын муниципальна тойрогой һунгамалнуудай зүблэлэй шангуудай түлөө һурагшадай дунда нээмэл мүрысөөн Амитхашын дунда һургуулиин дэргэдэ эмхидхэгдээ. Агын тойрогой 31 тосхонһоо 100 гаран хүүбүүд басагад хабаадаа.
Мүрысөөн гурбан шэглэлээр эмхидхэгдээ. Эндэ 7-һоо 18 наһа хүрэтэр хүбүүд, басагад хабаадаа. Нэгэдэхи бүлэгэй хүбүүдэй дунда, юһэтэй Тимур Цыренжапов түрүү һуури эзэлээ.
Тойрогой ажаһуугшадай дунда энэ тамирай зүйл ехэ дэлгэрэнги, олоной һонирхол татана. Тиимэһээ энэ мүрысөөн саашадаа үргэн дэлисэтэй болохо гэжэ хабаадагшад, эмхидхэгшэд найдана.
“Бүхэ нюдарга” тэмсээнэй шэнэ гар утаһан - гол шанда Шандали һууринай Буянто Доржиев хүртөө. Хоёрдохи һуури эзэлһэн Шандалиин Эрдэм Санжимитупов даага шуугөө, гурбадахи һуурида гаража, Һарлаг шан Догойн Доржо Цырендоржиев абажа шадаа.
