Энэ үглөөгүүр Олимпиин чемпион, сүлөөтэ барилдаагаар дэлхэйн абарга, Оросой тамирай габьяата мастер Давид Мусульбес Буряад орон руу ерэбэ. Нэн түрүүн, хүндэтэ айлшан уласай тамиршадай олониитэтэй  уулзалга үнгэргөө. Засагай газарта Буряадай түрүү һоригшод суглараа. Давид Мусульбес амаршалгын үгэ хэлэхэдээ, һурган хүмүүжүүлэгшэдэй ажалай шухала удха шанар  тэмдэглэбэ.

Суглаан асуудал-харюугай түхэлөөр үнгэрөө. Мүнөө үедэ һоригшодой һанаа зобооһон гол асуудалнуудай нэгэн гэхэдэ, дунда һургуули дүүргэһэнэй удаа олон тамиршад   барилдаагаа орхидог байна.

 Мүн лэ зүблөөнэй үедэ салин хүлһэнэй болон оршон байгуулга һайжаруулгада хабаатай асуудалнууд табигдаа. Һүүлэй хэдэн жэлэй туршада Буряадай, бүхыдөө Орос гүрэнэйшье тамирай бааза яһала һайн болоо, үшөө дээшээ болохо, салин хүлһэнэй талаар хэлэбэл, тэрэниие дээшэлүүлхэ асуудал табигдана гэжэ Давид Мусульбес тэмдэглээ. Юрэнхыдөө, манай һоригшодой болон тамиршадай олониитын түлөөлэгшэдэй тэмдэглэһээр, уулзалга ехэ һонирхолтой байгаа.

Олимпиин чемпион Буряад Улас нэгэл үдэрөөр ерэһэн байна гэжэ тэмдэглэлтэй. Тиимэһээ мэдээжэ тамиршан нилээд сүлөөгүй байба, тэрэ ехэ олон үйлэ хэрэгүүдтэ хабаадаа. Тамиршадай олониитэтэй уулзаһанай удаа Давид Мусульбес тамирай 7-дохи һургуули руу ошожо, эдир тамиршадта болон тэдэнэй һурган хүмүүжүүлэгшэдтэ мастер-класс үнгэргэһэн байна.