Улаан-Үдэ хотын захиргаанда буряад хэлэнэй комиссиин суглаан үнгэрбэ. Эндэ буряад хэлэн ниитын оршон байдалда хэр хүгжөөгдэнэб, эрдэм болбосоролой талаар ямар ажалнууд ябуулагданаб гэһэн асуудалнууд хэлсэгдээ, программануудай дүнгүүд согсологдоо.

Мүнөө дээрээ хаа-хаанагүй буряад хэлэн дээрэ гаршагтай хабтагайнууд үлгөөтэй, социальна талаар зар рекламатай болон соносхолой гаршагтай хабтагайнууд оршуулагдаһан, мүн лэ хотын ниитын транспорт соо тогтохо буудалнууд тухай хоёр хэлэн дээрэ соносхогдодог болонхой. Гадна июниин1-һээ Улан-Үдэ хотын захиргаанда буряад хэлэнэй талаар мэргэжэлтэн бии болохо. 

Тиин суглаан дээрэ Улаан-Үдэ хотодо буряад хэлэнэй багшанар хүүгэдэй сэсэрлигүүдтэ, һургуулинуудта олоор дуталдана гэжэ Улаан-Үдэ хотын захиргаанай Болбосоролой хорооной түрүүлэгшэ Анна Батурина элидхэл соогоо тэмдэглээ 

Гадна суглаанай хэмжээндэ дуратайшуул һанамжануудаа оруулха аргатай байгаа. «Буряад ФМ» радиогой захирал Жанна Дымчикова баһал өөрынгөө һанамжануудаар хубаалдаа. 

Буряад хэлэ сахин хүгжөөхэ асуудалда һүүлэй үедэ улас дотор ехэхэн анхарал хандуулагдана. Засаг түрын, нютаг һуурингуудай захиргаануудай болон эрдэмтэдэй оруулһан хубита ехэ. Теэд буряад айл бүхэн түрэл хэлэн дээрэ хөөрэлдэхэ, угсаатанайнгаа хэлэндэ үхибүүдээ һургаха гээшэнь шухала болоно гээд суглаанда хабаадагшад тэмдэглээ. Тиимэһээ бухы гэр бүлэ, нэн түрүүн, залуу айлнуудые буряад хэлэеэ шудалха, дэлгэрүүлхые уряалаа.