Үбэр-Байгалай Ага тосхондо “Алтан хайша” гэһэн этно-мастерскойдо бүряад үндэһэн хубсаһа оёхо һургуули ажалаа ябуулжа эхилээ. Оёдолшон Дашима Гончиковагай хүтэлбэри доро энэ һонирхолтой хэмжээ ябуулга эмхидхэгдэнэ. “Алтан хайша” гэһэн оёдолой һургуули Үбэр-Байгалай хизаарай буряад соёл хүгжөөлгын түб байгуулһан. Эндэ оёдолдо дуратай, һаяхан оёожо эхилжэ байһан урашуул ерэжэ тусхай һуралсал гараха аргатай.

Дашима Цыдыповна Гончикова бүхэли наһаяа оёно гэхэдэ алдуу бэшэ. Уран урлалда эжыниинь, нагаса эжынь һургаһан юм. 

Энэ удаа оёдолшодой һургуулида табан шабинар һуралсал гаража байна. Тэдэнэй тоодо Сахюурта нютагай Жаргалма Цыдендоржиева. Өөртөө тэрлиг оёжо дүүргэжэ байна. Уужыень оёхо үлөө. 

Нёдондо жэлэй һургуулида арбаад эхэнэрнүүд һуралсал гараа. Харин тэдэнэй тоодо ород яһанай һургашадшье байгаа гээд Дашима Гончикова хөөрэнэ. 

Буряад арадай соёлой баялиг сахиха, хүгжөөхэ, олондо дэлгэрүүлхэ талаар иимэ хэмжээ ябуулганууд хэрэгтэй гээд хабаадагшад булта тодорхойлно. Тиимэһэн тула түбэй мэргэжэлтэд энэ ажалаа бүри гүнзэгырүүлнэ. 

“Алтан хайша” мастерскойдо Һуралсал арбаад үдэрэй туршада ябуулагдаха. Оёдолшод заабол нэгэ бүтээл хэжэ харуулха ёһотой. Энэнь шалгалтын дүн болохо юм.