Буряадай альпинизмын холбооной тамиршад Илалтын 80 жэлэй ойн баярта дашарамдуулан, Зүүн Саяанай эгээл үндэр газарта, Мүнхэ-Һарьдаг хадын оройдо гараба. Альпинистнууд элинсэгүүдэйнгээ габьяае хүндэлжэ, Илалтын туг бэедээ абажа ябаа. Мүн баатар үбгэ эсэгэнэрэйнгээ дүрэ зурагуудые абажа, бүхэоросой «Хэтын жагсаал» гэһэн акцида оролсоһон байна.

Буряадай альпинизмын холбоон Мүнхэ-Һарьдаг хадын оройдо абиржа гараха үйлэ хэрэгые һорилгын һуралсалай хэмжээндэ бэелүүлбэ.

Тус холбооной бүридэлдэ гансал манай уласай зон  бэшэ, мүн лэ ондоо можо нютагуудай һайн дуратайшуул ороно. Жэшээлэн хэлэбэл, Джуус Антонов аяар холын Владивосток хотоһоо ерээ.

Аюулгүй байдал хангажа, хүндэ замаа амжалтатай түгэсхэхын тула хабаадагшад дүй дүршэл ехэтэй һоригшодой хүтэлбэри доро һорилго гараа.

"Буряад ТВ" телесубагай хүтэлбэрилэгшэ Виталий Раднаев тахилгата Мүнхэ-Һарьдаг хадын оройдо абиржа гараха хүшэр зам дабалсаа. Тэрэ үндэр амжалтануудые туйлаха гэжэ эрмэлзэдэг субагайнгаа һүр һүлдые үргэһэн туг мандуулан хиидхүүлхэһээ гадна, дайнай ветеран байһан Батор Балбарович Раднаев үбгэ эсэгынгээ дүрэ-зураг үргэһэн байна. 

Мүнхэ-Һарьдаг хада Буряад Монгол хоёрой хилэдэ  оршоно, тэрэ хадаа буряадуудай нангин шүтɵɵнтэй газар гэжэ тоологдодог. Тэндэ Саяан уулын һүлдэнүүд амидардаг, домогой ёһоор, буряад баатарлиг «Гэсэр» үльгэрһөө мэдээжэ Абай-Гэсэр хаанай улас эндэ байһан юм гэлсэдэг.