Агууехэ Илалтын 80 жэлэй ой баяр удангүй хаа хаанагүй тэмдэглэгдэхэнь. Агын Буряадай тойрогто һайндэр угтуулан олон тоото хэмжээ ябуулганууд эмхидхэгдэнэ. Залуушуул эдэбхитэй бүхы юумэндэ хабаадаха гэжэ оролдоно. Заншалта ёһоор тэдэ тойрог дотороо “Георгиевская лента” гэһэн акци үнгэргэнэ.
Ага тосхон дээрэ акциин шугамаар 4 мянган лентэнүүд тараагдахаар хараалагдана. Энэ ажал тосхоной залуушуулай таһаг ударидан ябуулна. Лентэнүүдые тараахадаа, хаана зүүгөөд ябахаб, ямар түхэлтэйгөөр лентэеэ зохёохоб, ямар газарта энэ лентэнүүдые уяжа болохогүйб гэһэн зүбшэлнүүдые ажаһуугшадта тайлбарилжа, хөөрэжэ үгэнэ.
Гэгээн Георгиин лентэ мүнөө Агууехэ Илалтын, Эсэгэ ороноо хамгаалгын дайнда хабаадаһан сэрэгшэдэй баатаршалгын һүлдэ тэмдэгүүдэй нэгэн юм. Харин анха түрүүшынхиеэ аяар 250 гаран жэлэй саана 2-дохи Екатерина хатан Гэгээн Георгиин шан байгуулжа, тэрэ орден тусхай лентэдэ торгогдодог байгаа. Гурбан хара, хоёр шара улаахан үнгэтэй зурамуудһаа лентэ бүридэнэ. Хара үнгэнь порох – дари гээшэ гэжэ тэмдэглэгдэнэ, шара улаан үнгэнь хадаа дайнай гал дүлэн гэһэн удхатай. Гэгээн Георгиин орден, удаань “За Победу над Германией” гэһэн медалиин лентэ иимэ түхэлтэй. Эдэ шангууд дайшалхы баатаршалга гаргаһан сэрэгшэдтэ барюулагдадаг байгаа.
Георгиевскэ лентэнүүдые бантик болгоод гү, али зангилаадаад зүрхэн таладаа үбсүүн дээрээ зүүхэ ёһотой. Сүүмхэ, автоунаануудые, үһэеэ, хубсаһа гэхэ мэтые энэ лентээр шэмэглэжэ болохогүй. Агууехэ Илалтын һүлдэ тэмдэг нангинаар сахихань шухала.
