Хуралдаанда хабаадагшад 2 үдэрэй туршада ниигэмэй, эдэй засагай, соёлой хүгжэлтын талаар шухала асуудалнуудые зүбшэн хэлсэжэ, ажабайдалай шанар дэшэлүүлхэ түсэлнүүдээ дурадхаһан байна. Эрхимүүдэй тоодо ороһон түсэл зохёогшод эдэбхи үүсхэлээ бэеэлүүлхын тула мүнгэн шангаар урмашуулагдаа. Тиин «Молодежь на селе» гэһэн шангай янзада Захааминай аймагай залуу мэргэжэлтэн Дарина Балданова шалгарба.
«Сайн» гэһэн хуралдаанда ганса уласаймнай залуушуул хабаадаа бэшэ, мүн лэ ондоошье можо нютагуудһаа түлөөлэгшэд ерэһэн байна.
Иимэ хэмжээ ябуулга уластамнай түрүүшынхиеэ үнгэрбэ. Энэ хуралдаа үнгэргэхэ тухай бодол Буряад Уласай Арадай Хуралай дэргэдэхи залуушуулай танхимай гэшүүдтэ ерэһэн байна.
Залуушуулай хуралдаа эмхидхэгшэд дүй дүршэлөөрөө хубаалдаха талмайнуудай шухала үүргые онсолжо, энэ хэмжээ ябуулгаяа саашадаашье үнгэргэжэ байхаар түсэблөө.
