Агын тойрогой эрхим гүйгөөшэд эгээл хурдануудаа элирүүлбэ. Заншалта ёһоор Ага тосхон дээрэ “Агын үнэн” һониной шангай түлөө хүнгэн атлетикээр урилдаан эмхидхэгдээ.

Мүнөө жэл 37 командануудые 330 тамиршад түлөөлбэ. Тэдэнэй тоодо 17 наһатай Александр Будажапов. Тэрэ Дулдаргын 2-дохи дунда һургуулиин 11-дэхи ангиин һурагша. Багаһаа хүнгэн атлентикээр бэеэ һоридог, элдэб хэмжээнэй урилдаануудта хабаадаһан, нэгэтэ бэшэ абаргануудай тоодо ороһон. “Агын үнэн” газетын шангай мүрысөөндэ аймагаа түлөөлжэ ерээ.

“Агын үнэн” һониной шангай урилдаан хадаа энэ удаа 75-дахияа эмхидхэгдэбэ. Онсонь гэхэдэ, мүнөө жэл газетэ 95 жэлэйнгээ ой тэмдэглээ. Мүрысөөндэ бэлэдхэл ехэ харюусалгатай байгаа гээд һониной ахамад редактор Арсалан Добчинов тодорхойлно. 

Гурбан зуу гаран тамиршад гурбан бүлэгөөр хубаагдажа, түрүүшын бүлэгтэ 8 залуу хүдэлмэришэдэй команданууд урилдаа. Хоёрдохидонь оюутад, һургуулиин басагадууд, гурбадахи бүлэгтэ – хүбүүд урилдаа.

Хамта дээрэ тамиршад таба мянга шахуу метрэй зай гаталаа. Тон багань 300 метр, эгээл ута зай 800 метр байгаа. Урилдаанай дүнгүүдэр Дулдаргын аймагай команда түрүүлээ. 

75 жэлэй хугасаа соо энэ мүрысөөн хэдэн үеын гүйгөөшэдые урган гаргаа. Нэн түрүүн энэ урилдаан тамирта, хүнгэн атлетикэдэ залуушуулай дура татана. Агын тойрогой эгээл мэдээжэ, тон хүлеэгдэмэ урилдаан мүн. Нютаг бүхэн командаяа табиха гэжэ оролдодог гээд Россиин тамирай габьяата хүдэлмэрилэгшэ Дашинима Цыденов хөөрэнэ. Дашинима Жамсарановичай шабинаршье хабаадаа.