Улаан-Үдэдэ һая үнгэргэгдэһэн Ким Базарсадаевай нэрэмжэтэ «Эрэшүүлэй абяа дуунууд» гэһэн оперын залуу дуушадай мүрысөөндэ Алас Дурнын, Сибириин, Ураалай, мүн Монголой, Хитадай дуушад хабаадаһан байна.

Мүрысөөнэй түрүүшын шата харилсаагүй гуримаар үнгэрөө,  тэндэ 70-аад дууриин дуушад хабаадаһан байна. Жюриин  гэшүүдтэ хабаадагшадай тоглолтонуудай видеобуулгабаринууд эльгээгдэһэн байгаа, тэрэнэй дүнгөөр хабаадагшадай хахадһаа багань мүрысөөнэй удаадахи шатада гаража шадаа. Удаадахи шатада тэдэнэр оркестрэй дахалдаһан хүгжэм доро дуугаа гүйсэдхэбэ, энэнь эгээл хүшэр шата байгаа гэжэ хэлэлтэй. Тиимэһээ гансал абьяас бэлигтэй дуушад түгэсхэлэй шатада орожо шадаба.

Ород, монгол, буряад, итальяншьеш хүгжэм зохёогшодой зохёолнуудые, юрэнхыдөө, дэлхэйн классигуудай хүгжэмүүд Буряадай оперо болон баледэй театрай тайзан дээрэ гала-тоглолтодо зэдэлээ. Буряадай харагшад бэлигтэй оперно дуушадые халуунаар угтан абаһан байна.

Шүүгшэдэй тэмдэглэһээр, эрхимүүдые шэлэхэнь тон орёошог байба. Тиигэбэшье һууринуудынь иигэжэ хубаарилагдаа: Монголһоо ерэһэн Гантулгаа Алтанхуяг – гурбадахида,  Эрдэнээ Очирсайхан – хоёрдохидо, Улаан-Үдын Чингис Иванов нэгэдэхи һуурида гарабад. Шангай һуури эзэлэгшэдтэ 70, 100, 150 мянга түхэригтэ үнэмшэлгэнүүд барюулагдаһан байна.

Дээдын шанда монголой дуушан Тогсбаяр Санжаа 300 мянган түхэригтэ, мэдээжэ мүнгэшэ дархан Жигжит Баясхалановай урлан бүтээһэн үнэтэ хутага бэлэгтэ хүртөө.