Апрелиин 22-то Зүүн-Сибириин гүрэнэй технологиин ба хүтэлбэриин ехэ һургуулиин түрүүшын захирал Дамнин Шагдурович Фроловой түрэһөөр, 100 жэл гүйсэбэ. Энэ ушараар элдэб хэмжээ ябуулганууд эмхидхэгдэнхэй, тэрэ тоодо үндэр нэрэ зэргэтэй багшын нэрэ мүнхэрүүлхэ удхатайгаар ехэ һургуулиин дэргэдэ хүшөө бодхоогдожо, түрэһэн үдэртэнь нээлгын ёһолол үнгэрбэ.

Дамнин Фролов юрын бэшэ, бэлигтэй, сэсэн хүн байһан, Зүүн-Сибириин технологиин дээдэ һургуули 1962-һоо 1992 он болотор, 30 жэлэй туршада хүтэлбэрилжэ ябаа. Улаан-Үдэ хотын болон Буряадай АССР-эй гүрэнэй болон ниитын ажабайдалда эдэбхитэй хабаадалсаһан юм. 

Хэмжээ ябуулгада Дамнин Фроловой түрэлхид, ажалай ветеранууд, нютагаархид, уласай Засагай газарай болон олониитын түлөөлэгшэд, шабинарынь суглараа.

Дамнин Шагдуровичай хүтэлбэри доро һуралсалай байшан, хамтын байра, багшанарай гэрнүүд баригдаһан байдаг.

Олон жэлнүүдэй хугасаа соо тус дээдэ һургуули эрхим амжалтануудые туйлаа: багахан болбосоролой эмхиһээ Зүүн-Сибириин болон Алас Дурна зүгэй эгээл ехэ  болбосоролой болон эрдэмэй түб болонхой.

Түрүүшын захиралай тоонто нютагта, түрэл Түнхэндэнь  баһал иимэ мүнхэ дурасхаалай хүшөө һаядаа табигдаха.