Буряад арадай бүхэ барилдаан хадаа хүнэй шуранаа, дүрэеэ, арга мэхэеэ харуулха гэһэн гуримтай байдаг. Хотын Бэеын соёлой, тамирай ордондо нэгэ доро 10-аад тулалдаанууд болобо. Эндэ эрхимэй нэрэ зэргын түлөө 700 гаран хабаадагшад тэмсэбэ.

Бүхэ барилдаан – буряад арадай соёлой таһаршагүй хуби. Барилдаанай арга дүрэ, мэхэ гохо элдэб янзын байдаг. Бэеэр томо, багжагар, хүдэр, шамбай солбон, гаһар хүсэтэй бүхэ хүлөө барюулхаяа айдаггүй. Хүлдэ оромсоорнь, дээрэһээнь хоёр гараараа бэеыень тэбэреэд, үргэжэ хаяжархидаг. Гар, хүлөө буляасалдажа барилдахада, эгээл гоё, һонирхолтой барилдаан болодог. Дотор, гадар дэгээ хэхэ, ташаалха, үбдэглэхэ, толгой, гараараа һуга доогуурнь орожо үргэхэ, хүлыень татажа, гэдэргэнь унагааха гэхэ мэтэ арга мэхэнүүд яашахаб?

Заншалта болоһон 17-дохи мүрысөөн Сагаан Дара Эхэдэ – Хандама бурханда зорюулагдана, энээниие Буддын шажантанай заншалта Сангха эмхидхэнэ. 

Буряадуудай дунда барилдааша хүбүүд олоор дайралдадаг. Тиимэһээ бүхэ барилдаан хадаа hайндэрэй шэмэг боложо үгэдэг. Табан барилдаашадые илаhан бүхэдэ Харсага бүхэ, долоое – Заан бүхэ, бүрин түгэс барилдаашаниие илагшада Арсалан бүхэ гэжэ нэрэ соло олгогдодог.