Һуралсалай ба лабораторинуудай байшан, хамтын байранууд, тамирай түб ба тамирай талмайнууд, багшанарай байранууд, унаа тээбэринуудые табиха газар. Эдэ бүгэдэ хадаа «Байгал» гэһэн дэлхэйн хэмжээнэй болбосоролой дээдэ һургуулинууд хоорондын кампуста түхеэрэгдэхэ байна. Тэрэниие 2025 ондо барижа эхилхэ түсэбтэй. Мүнөө дээрээ саарһа дансануудынь шалгалта гаража байнхай. Энэ кампусай һуури татаха газар тодорхойлогдонхой.
Кампус хадаа табан ехэ һургуули нэгэдүүлхэ. Тэрэнэй ябуулха ажалай гол шэглэлнүүд гэхэдэ, технологиин арга зүйн инжиниринг, нэгэдхэмэл эмнэлгэ, зүүн зүгэй эмнэлгэ шудалалга, АТР-эй гүрэнүүдтэй харилсаа холбоо хүгжөөлгэ болоно.
Үшөө тиихэдэ Шри-Ланка, Непал гүрэнүүдтэй хэлсээ баталжа, мэргэжэлтэдые бэлдэхэ түсэб табигдана. Мэргэжэлтэдые бэлдэхын хажуугаар, эрдэм шэнжэлэлгын ажал ябуулха асуудалда ехэ анхарал хандуулагдажа байна. Олон лабораторинууд, эрдэмэй түбүүд баригдажа, тэндэ багшанар, оюутадшье эрдэм шэнжэлэлгын ажал ябуулха аргатай.
Шэнэ кампус хадаа оюутадай ажабайдал шэнэлхэ, тэдэнэй сүлөө сагаа үнгэргэхэ, эрдэм болбосоролоо дээшэлүүлхэ талаар зохид байдал байгуулхаһаа гадна Улаан-Үдын бүхы ажаһуугшадта болон уласай айлшадта хододоо нээлгэтэй хотын шэнэ квартал болохо гээд тэмдэглэмээр.
