Ивалгын аймагай Сотниково һууринда 2 мянга гаран дүрбэлжэн метр талмайда Олон һалбарита түбэй барилга ябуулагдажа байна.

Байгша оной июль һарада энэ барилга дүүргэхээр түсэблэгдэнхэй. «Хотын таарамжатай зохид оршон байгуулга» гэһэн программын хэмжээндэ энэ түсэл бэелүүлэгдэжэ байна. Холбоото уласай мүрысөөндэ илаһанай дүнгөөр энэ хэрэгтэ 150 сая түхэриг мүнгэн һомологдоо. Барилга эхилхэһээ урид үргэн дэлисэтэй шэнжэлэлгэнүүд, олониитын зүбшэн хэлсэлгэнүүд үнгэргэгдөө болон элдэб наһанай зоной һанамжанууд хараада абтаа.

Олон һалбарита шэнэ түб «Хии морин» гэжэ нэрлэгдэхэ. Шэнэ байшан урлан барилгада оршон үеын барилгын онол арганууд хэрэглэхэ, үндэһэн заншалнуудай онсо шэнжэ оруулха юм. Ивалгын аймагай ажаһуугшадай дурадхаһанай еһоор, эндэ захиргаанай, ниигэмэй–соёлой, болбосоролой гурбан гол модуль зохёогдонхой.

Алас Дурна зүгэй болон Арктикын хүгжэлтын корпорациин ниигэмэй хүгжэлтын талаар гүйсэдхэхы захирал Гасан Гасанбалаевай тэмдэглэһээр, Сотниково һууринда баригдажа байһан Олон һалбарита түб Орос гүрэн дотор жэшээтэ болохо түб юм.