Улаан-Үдэдэ һургуулинуудай командануудай хоорондо волейболоор «Мүнгэн бүмбэгэ» гэһэн бүхэроссиин мүрысөөнэй можо нютагай шата эхилбэ. Мүнөө жэлдэ 2010-2011 онуудта түрэһэн эдиршүүлэй 8 команда хабаадана. Илалта туйлахын түлөө тэмсэгшэдэй дунда Ивалгын аймагай Сотниково һууринай наадагшад бии.

Түгэсхэлэй нааданда ороһон команданууд аймагуудтаа түрүүлжэ, энэ эрхэдэ хүртөө гээд тэмдэглэлтэй. Сотниково һууринай команда нэрэ зэргэеэ баталжа, һорилгын һуралсал гараһан байна.

Тиихэдэ Хурамхаанай аймагай волейболистнууд баһал  шанга шэлэн абалга дабажа гараа. Түгэсхэлэй шатада тэдэ хоёрдохи бүлэгтэ орожо, тэндэ түрүүшын нааданда Улаан-Үдэ хотын 8-дахи һургуулиин командатай уулзаба. Тус нааданда  2:1 гэһэн тоотойгоор Хурамхаанай команда шүүхэ азатай байба.

Бусад команданууд мүн лэ һонирхолтой наада харуулаа. Гурбан нааданда хабаадажа, илагша элирүүлэгдэхэ ёһотой. Мүрысөө эмхидхэгшэдэй тэмдэглэһээр, наадагшадай шадабари жэлһээ жэлдэ дээшэлнэ.

Мүнөөдэр хүбүүдэй дунда илагша элирүүлэгдэхэ, харин үглөөдэр, мартын 12-то, басагад бүхэроссиин мүрысөөнэй түгэсхэлэй нааданда хабаадахын түлөө тэмсэхэ байна гэжэ тэмдэглэлтэй. Нёдондо түгэсхэлэй наадан Краснодар хотодо болоо һэн. Байгша ондо «Мүнгэн бүмбэгын» гол наадануудай үнгэргэгдэхэ газар можо нютагуудта шэлэн абалгын мүрысөөнэй дүүрэһэнэй удаа апрель һара соо соносхогдохо.