Гэльбэрын һургуулиин түүхэ үнгэрһэн зуун жэлһээ  эхитэй. Түрүүн церковно- приходской һургуули, Октябриин хубисхалай һүүлээр эхин шатын, харин мүнөө һүүлэй хэдэн жэлэй туршада юрэнхы болбосоролой дунда һургуули болонхой.

Мүнөөдэрэй байдалаар Гэльбэрын дунда һургуулида 161 үхибүүн һурана, 16 багшанар ажаллана. Үнгэрөөшэ жэлдэ һургуули «Ехэ заһабари» гэһэн программада орожо, шэнэ хушалтатай болоо, шэнээр сонхонууд табигдажа, зохид, һаруул, дулаан болоһон юм. Танхим бүхэниинь сахим самбараар, компьютернуудаар хангагданхай.

Һургуулиин дэргэдэ «Романтик» гэһэн зунай амаралгын лагерь ажалладаг, тэндэ үхибүүд ганса амарна бэшэ, мүн лэ буряад хэлэеэ, ёһо заншалаа гүнзэгыгөөр үзэдэг, элдэб хэмжээ ябуулгануудта хабаададаг. Һургуули соонь Хизаар ороноо шэнжэлэлгын музей бии, харин мүнөө тэрэнь заһабарилгада оронхой. Һургуулиин ханануудта Гэльбэрын мэдээжэ зонуудта зорюулагдаһан стенднүүд үлгөөтэй.

Галдан Ленхобоев энэл нютагһаа гарбалтай мэдээжэ түбэд эмшэн, аяншалагша, археолог, фольклорист – тэрэ  олон мэргэжэлтэй хүн байһан юм. Гэбэшье олон жэлэй туршада «Электромашина» заводто ажаллаһан байдаг. Мүн лэ Гэльбэрэ тоонтотой поэт Бабасан Абидуев, Ивалгын аймагай гимнын автор Алексей Бадаев, уран зохёолшо, ирагуу найрагша Любовь Намжилон гэхэ мэтэ зон тухай мэдээсэл энэ мүзейдэ нангинаар хадаглагданхай. Энэ мүзейдэ үнэтэй сэнтэй зүйлнүүд олон, тэрэ тоодо хуушан монгол хэлэн дээрэ бэшэһэн урданай бэшэгүүдшье. 

Һургуулиин дэргэдэ «Юнармия», «Орлята России» хүдэлөөнүүд, хатарай «Улаалзай» бүлгэм, гар бүмбэгын, бүхэ барилдаанай секцинүүд ажалладаг. Һурагшад болон багшанар эрдэмэй-практическа конференцинүүдтэ, янзын түсэлнүүдтэ, уласай болон можохоорондын мүрысөөнүүдтэ хабаадажал байдаг.