Буряад Уласай үндэһэн һургуулинуудай эблэлдэ ородог һургуулинуудай дунда заншалта болоһон фестиваль байгша ондо Баргажанай аймагай Уланай дунда һургуули бэе дээрээ даажа абаад, олон айлшадаа хүндэтэйгөөр угтаба.

Тус фестивальда бүхыдөө уласай 17 һургуулинуудһаа хабаадагшад суглараа. Эндэ үхибүүд дуу дуулажа мүрысөө, шүлэгүүдые уран гоёор уншаа, шагай наада, тэбэг сохилго, ташуур таталга гэхэ мэтэ зүйлнүүдээр хаба шадалаа туршаһан байна.

Түхэреэн жэлэй туршада эблэлдэ ородог һуралсалай гуламтануудай түлөөлэгшэд хэды удаа уулзажа байдаг. Багшанарынь бэе бэетэеэ уулзажа, һуралсал гараад, дүй дүршэлөөрөө хубаалдадаг, мүн лэ үхибүүдынь буряад ёһо заншал һэргээлгын ажалда хододоол хабаадуулагдажа байдаг юм. Тэрээнһээ гадуур, элдэб хэмжээ ябуулганууд үнгэргэгдэжэ байдаг, тэдэнэй дунда Сагаалганай найр хадаа гол һуури эзэлнэ.

Уласай үндэһэн һургуулинуудай эблэл 2014 ондо байгуулагдаһан. Анха түрүүн эндэ 7 һургуули ородог һаа, жэлэй ошохо тума тэрэнэй тоо нэмэжэл байдаг. 

Тус хэмжээ ябуулгын зорилго хадаа ургажа ябаа залуу үетэндэ үндэһэтэнэй шэнжэ байгуулха, буряад арадайнгаа ёһо заншал һэргээхэ, сахиха, олондо дэлгэрүүлхэ, буряад хэлэ, уран зохёолоо хүгжөөхэ гэһэн удхатай, тэрэнэйнь урманда энэ талаар ажалай амжалтатай ябажа байһаниинь ехэ һайшаалтай.