Общество

Соёлой гуламта

4 февраля 116
Буряад ТВ

Хэнэйшье мэдэһээр, нютаг бүхэндэ Соёлой байшан хадаа тосхоной соёлой ажабайдалай гуламта болодог гээшэ ааб даа. Эгэтын-Адагай Соёлой байшан түүхээр баян, аяар 1940-өөд онһоо эхитэй. 2022 ондо ехэ заһабарилгын һүүлээр энэ шэнэ түхэлтэй боложо, нютагаархидаа ехэтэ баясуулһан юм. Соёлой байшанай дэргэдэ аймаг дотороо, мүншье уластаа мэдээжэ болоһон дуу, хатарай «Аялга», хүүгэдэй хатарай «Ая ганга» бүлгэмүүд, арадай театр  нютагайнгаа зоной нюдэ хужарлуулжа, аялгата дуу зэдэлүүлжэ, гоё хатарнуудаа хатарһаар зандаа.  

Эдэл зоной хүсөөр хүдөөгэй соёл унтарнагүй, арадай ёhо заншал хүгжэнэ, дамжуулагдана гэхэдэ, алдуу болохогүй. Ямаршье хүндэ хүшэр сагта Эгэтын-Адагай ажаһуугшад урма зоригоо алдангүй, ажалаа урагшань ябуулжа, нютагайнгаа ажабайдал анхаржа, соёлоо үргэжэ, түрэл орондоо туhатай байхые оролдожол байдаг. Сэрэгэй тусхай ябуулгын үедэ Соёлойнь байшан һайн дуратанай штаб болонхой. 

Эгэтын-Адагай мүнгэн толгойтон сэрэгэй тусхай ябуулгада хабаадажа байһан сэрэгшэдээ дэмжэһээр зандаа. Тэдэнэй гараар окопна дэнгүүд, далдалан халхалха хэрэгсэлнүүд, дулаан хубсаһа хунар гэхэ мэтэ бэлдэгдэжэ, тиишэ эльгээгдэнэ. Соёлойнгоо байшанда тэдэнэр үдэр бүхэн ерэжэ, багаханшье һаа хубитаяа оруулна гээшэ. 

Иимэл зоной хүсөөр илалтамнай ойртоно ха юм. Сэрэгшэднай Һайн дураараа туһалагшадай дэмжэлтэ болон анхаралые хүсэдхэн мэдэрнэ, залуушуулнайшье тэдэнэй жэшээгээр һайн хэрэгтэ эдэбхитэйгээр хабаадана, тэрэнь ехэ шухала.