
Сурбалжалагшад, зураг буулгагшад ба дамжуулга хүтэлэгшэд. Эдэ хадаа түрэл буряад хэлэн дээрээ уласайнгаа элдэб hалбаринуудай ажабайдал, туйлалтануудые харуулжа, өөрынгөө ажалаар энэ хэрэгэй нилээд шухала байhые гэршэлдэг зон.
Буряадай Толгойлогшо Алексей Цыденов сэдхүүлшэдые саашадаашье можо нютагай ажабайдалда эдэбхитэйгээр хабаадажа, тэрэнэй хүгжэлтые, урагшаа дабшаха хэрэгые дэмжэжэ байха гэжэ этигэжэ байhанаа мэдүүлээ
“Вся Бурятия” гэһэн мүрысөөндэ 15 шэглэлээр сурбалжалагшадай ажал сэгнэгдээ. Буряад ТВ субагай сэдхүүлшэдэй түсэлнүүд мүн лэ үндэр шагналнуудта хүртэбэ. «Мэдээсэлэй дамжуулгын эрхим хүтэлэгшэ» гэһэн шэглэлдэ манай сурбалжалагша Владимир Севрюк 2-дохи һуурида гараба.
«Гэр бүлын жэлдэ зорюулагдаһан эрхим толилолго» гэһэн шэглэлдэ «Буряад ТВ» субагай дамжуулгануудые хүтэлэгшэ Намсалма Борбонова илажа гараа. «Буряад ТВ» субагай Бэеэ дааһан аралжаанай бэшэ эмхи зургаанай захирал Евгений Янтыров Буряад Уласай Засагай газарай Хүндэлэлэй грамотаар шагнагдаба, дэлгэсэй зураг буулгагша Владислав Цыбенов «Эрхим теле-буулгагша» шэглэлдэ баһал илажа гараа.
Жэл бүри эмхидхэгдэдэг “Бүхы Буряад орон” гэhэн конкурс можо нютагай олондо мэдээсэл тараадаг хэрэгсэлнүүдэй бүхы түлөөлэгшэдтэ удха шанартай хэмжээ ябуулга болонхой. Энэ хадаа улас дотор хүдэлжэ байһан эрхим сэдхүүлшэдые дэмжэхэ, урмашуулха зорилготой юм.