Хяагтын аймагай Баин Булаг нютагта 19-дэхи зуун жэлэй эхиндэ буряад угасаата зоноо суурхуулха, буддын шажанай дэлгэрүүлгэдэ ехэхэн хубита оруулха заятай хүбүүн түрэһэн юм.

Тэрэ хадаа олондо мэдээжэ, үндэр зиндаатай Чойдаг Дагва Бадмажапов. Долоо наһатайдаа тэрэ хубараг боложо, буддын шажанай һургаал, гүн ухаа шудалжа эхилһэн байна. 25-тайдаа Түбэд орон руу ошожо һураад, Һаарамба лама гэһэн үндэр нэрэ зэргэдэ хүртэһэн юм. 1946 ондо «Термины – ясные слова» гэһэн толинь нара хаража, хэдэн үе санаартанай, эрдэмтэдэй шэнжэлхэ ажалайнь үндэһэ һуури болоо. 

Чойдаг лама Бадмажаповай «Термины – ясные слова» гэһэн түбэд хэлэнэй тайлбариин толи монгол ба ород хэлэнүүд дээрэ оршуулха ажал Ивалгын дасанда эхилээ. Энээ удаа Бандида Хамба лама Дамба Аюшеевай ударидалга доро Оросой, Монголой, Энэдхэг гүрэнүүдэй лама санаартанай, эрдэмтэдэй хабаадалгатай хуралдаан үнгэрөө.

«Термины – ясные слова» гэһэн толи түбэд хэлэ тон тодоор, зүбөөр тайлбарилһан толи гэжэ эрдэмтэд тэмдэглэнэ. Дэлхэй дээрэ тиимэ тодо толи байхагүй гэхэдэ алдуу бэшэ. Хитад орондо энэ толи зургаа дахин хэблэгдэжэ гараһан юм. Хэлэ шудалагшадта ехэ туһатай ном, хэдэн үе эрдэмтэд, ламанар энэ толи дээрэ үндэһэлэн шэнжэлгэнүүдые хэһэн.

Баин Булагай ажаһуугшадай үүсхэлээр, Бандида Хамба лама Дамба Аюшеевэй үреэлээр, 2024 оной зун Чойдаг Дагва ламын дурасхаалда хүшөө бодхоогдожо, нэрэнь мүнхэлэгдэбэ.