Олон жэлэй туршада Буряад Уласта ТОС-уудай хүдэлөөн эдэбхитэйгээр ябуулагдана. Арад зон өөһэдынгөө хүсөөр нютагаа һайжаруулха гэжэ оролдоно.

Хэжэнгын аймагай Үлзытэ нютагта хэдэн ТОС ажаллана. Тэдэнэй һайгаар олон юумэн хэгдэһэн байна. Жэшээлбэл, «Худан» гэһэн ТОС нютагтаа ехэ огород байгуулжа элдэб эдеэ тарина, капуста, хартаабха, морхооб гэхэ мэтэ. Хажуудань мүншье жэмэстэ саад ургуулагданхай. 

Намар тээшээ ургасаяа хуряажа тэдэ олон үхибүүтэй айлнуудта хубаадаг заншалтай, мүншье хабартаа рассада тарижа залуу айлнуудта баһал тараадаг. Энэ ТОС-ойнхиид соёлойнгоо байшанда сэрэгэй тусхай ябуулгада ошоһон сэрэгшэдээ дэмжэжэ, далдалан халхалха хэрэгсэлнүндые, окопно дэнгүүдые  бүтээнэ, арга шадалаараа мүнгэ суглуулжа, хэрэгтэй юумэ худалдан абана. Долоон хоногой нэгэ удаа «Алтан гэрэл» маани мэгзэм уншана.  

Тэрэнэй хажуугаар нютагай түбтэ ажаһуугшад өөһэдынгөө хүсөөр «Аллея Памяти» гэһэн дурасхаалай хүшөө бодхообо. Жэлэй хугасаа соо мүнгэн һомологдожо, Эсэгэ ороноо хамгаалһан фронтдо мордоһон 112 сэрэгшэдэй, мүншье мүнөө сэрэгэй тусхай ябуулгада баатарай үхэлөөр унаһан гурбан хүбүүдэй нэрэ мүнхэлэгдэбэ. 

Энэ хүшөө хадаа манай эрхэ сүлөө хамгаалһан зоной мүнхэ дурасхаалай һүлдэ болохо гэжэ тэдэ найдана. Нютагайнгаа ажаһуугшадай, ТОС-уудай хүсөөр Үлзытэдэ уншалгын гэр бии болоһон байна. 1918 ондо баригдаһан хуушарһан гэр 2 жэлэй туршада шэнэлэгдэжэ, сэбэрлэгдэжэ, уншалгын гэр болгогдоһон байна. 

Мүнөөнэй хүшэрхэн сагта хамтаржа ажалаа хээгүй һаа, юумэн хубилхагүй, хүгжэхэгүй гээшэ аабдаа. Хүдөө нютагуудай ажаһуугшад өөһэдөө эдэбхи үүсхэл гаргажа, аргагүй ехэ ажал ябуулна. Нэн түрүүн, тэдэнэр  ажабайдалаа һайжаруулха гэжэ оролдоно. Хэнэйшье мэдэһээр ТОС-уудай хүсөөр ехэ ажал ябуулагдадаг: байшангууд, үйлсэ гудамжанууд заһабарилагдадаг, гэрэлтүүлгэ хэгдэнэ, хүүгэдэй наадаха, тамираар бэеэ һорихо талмайнууд баригдана.