Ноябриин 27-до Улаан-Үдэ хотын захиргаанда буряад хэлэнэй комиссиин суглаан үнгэрбэ. Эндэ буряад хэлэеэ гүрэнэй хэлэн гэжэ сахин хүгжөөхэ асуудалнууд болон программануудай дүнгүүд соглосологдоо. Мүнөө дээрээ  «Титан», «Хозяин», «Полином», «Барис» дэлгүүрнүүдэй  таһаг бүхэндэнь буряад хэлэн дээрэ бэшэгдэһэн хабтаһанууд үлгэгдэнхэй гэжэ Эльвира Дашиева мэдээсээ.

Тамирай 18 һургуулинуудта буряад хэлэ шудалха таарамжатай оршон байгуулагданхай. Бүхы тамирай һургуулинуудай танхимууд соо мүн лэ буряад хэлэн дээрэ бэшэгдэһэн 50 гаран хабтаһанууд үлгөөтэй. Буряад хэлэеэ дэлгэрүүлхын тула тамиршад һорилгын ябасаһаа видеоролигуудые буулгажа, гүрэнэйнгөө хэблэлэй албангууд руу эльгээнэ.

Хотын мэр Игорь Шутенковай даабаряар, Улаан-Үдэ хотын захиргаанда буряад хэлэнэй талаар комисси байгуулагдажа, тэрэнэй бүридэлдэ хотын захиргаанай, болбосоролой болон эрдэм ухаанай, Буряад Уласай олониитын танхимай түлөөлэгшэд болон сэдхүүлшэд ороо.

 Энэ суглаанай хэмжээндэ ниигэмэй болон залуушуулай бодолгын талаар хороон буряад хэлэеэ дэлгэрүүлхэ зорилготойгоор түрүүшынхиеэ «Түрэл хэлэнэй түшэг» гэһэн хотын мүрысөө үнгэргэһэн байна. Эндэ 5 шангай янзада хабаадагшад мүрысэһэн байгаа. «Эрхим бүлэ» гэһэн нэрэ зэргэдэ Хориин аймагай Баир, Саяна Дабаевтан хүртэһэн байна.

Хотын мэр Игорь Шутенковай өөрын комисси байгуулха гэжэ шиидэһэниинь һайшаалтай. Захиргаан мүнөө, үнэхөөрөөшье, буряад хэлэ сахин хүгжөөлгэдэ онсо анхарал хандуулһаар.