“Гушад угай хори буряадууд” гэһэн ном нара хаража, Оросой Холбоото Улас дотор ажаһуудаг гушад угай үри һадаһад Улаан-Үдэ хото дээрэ сугларба.

Гушад угайнгаа дээжэ болохо, нютаг нугадаа мэдээжэ, мүнөө үеын залуу зондо жэшээ болохо хүбүүд басагад тухайгаа очеркнуудые бэшэжэ, номой хуудаһанууд дээрэ нэрэнүүдыень мүнхэлбэбди гээд авторнууд тодорхойлно. Һаяын, Совет засагай, хаанта засагайшье үеын түүхэдэ сараа үлээһэн, Эсэгэ ороноо хамгаалгын дайнда эрэлхэг зоригтойгоор хабаадаһан Гушад уг изагууртанай намтар хэдэн бүлэгүдээр хубаарилагдан бэшээтэй. Авторнууд ехэ шэнжэлэлгын ажал хэжэ, гүрэнэй архивай, нютагай үндэр наһатайшуулһаа, эмхи зургаануудай, дасануудай жасаһаа олоһон туухын элдэб саарһануудые үзэһэн байна. 

Ном соо онсо һуури Гушад арадай угай бэшэг эзэлнэ. Энэ талаар баһал горитой ажал ябуулагдаа гээд номой авторнууд тодорхойлно. 

Тиигэжэ Гушад угай үри һадаһад 19-20 үе болотор угаа мэдэхэ аргатай. Ном соо энэ бэшэг хэблэгдэжэ, мүнөө үыен залуушуулда дамжуулагдахань. Шэнэ ном 528 хуудаһатай, гурбан зуун экземляр тарижаар хэблэгдээ. Саашадаа Гушад угай айл бүхэндэ шэнэ ном дамжуулагдаха бэзэ гээд найдалаа сугларагшад мэдүүлбэ.