Ноябриин 1-һээ 4 болотор Буряадай ниислэл хотодо «Сердце Байкала» гэһэн спортивна аэробикоор можо хоорондын мүрысөөн үнгэргэгдэхэнь. Тус мүрысөөндэ уласаймнай, Үбэр Байгалай, Примориин, Алтайн хизаарай, Эрхүүгэй, Свердловскын, Омскын, Новосибирскын можонуудай, мүншье хүршэ Монголой болон Хитадай, бүхыдөө 500-гаад тамиршад ерэхээр хараалагдана.  

Энэ шэглэлээр мүрысөөн түрүүшынхиеэ Буряад Уласта нёдондо эмхидхэгдэһэн гэжэ һануулая. Тус мүрысөөн хотодомнай Бэеын соёлой болон тамирай байшанда үнгэрхэ. Тэрэнэй хажуугаар ноябриин 4-һөө 10 болотор хотодо 17, 19, 21 наһа гүйсөөгүй хүбүүд, басагадай дунда һомоор буудалгаар Алас Дурнын федеральна тойрогой чемпионат болон Спортын зэбсэгэй эрхим конструктор, СССР-эй габьяата һоригшо, спортын габьяата мастер Ефим Хайдуровай дурасхаалда зорюулагдаһан бүхэроссиин мүрысөөн үнгэргэгдэхэнь.  

Тус мүрысөөндэ Орос гүрэнэй болон хари гүрэнүүдэй тамиршад хабаадаха,  манай улас 65 тамиршад түлөөлхэ.  Ефим Хайдуровай дурасхаалай мүрысөөндэ илажа, тусхай эрилтэнүүдые дүүргэһэн хабаадагшад тамирай мастер нэрэ зэргэдэ хүртэхэ аргатай. Мүрысөөн Буряадай ниислэлэй түб стадион дээрэ үнгэргэгдэхэ.